貼身感受

升市，明日可能已經接近萬八點，但點解會咁多人買熊證、Put輪呢，仲會有咁多人睇淡呢，不外乎一樣，大多數人都處身於減薪、放無薪假或者失業之中，樓股皆升，同貼身感受完全相反，股市只係由資金所推動。
但資金睇到的亦可能不一樣，玖龍紙業、富力地產、世茂房地產等股票，同最低位比，起碼都翻了一翻，又點解呢，資金睇到的應該係覺得企業破產的可能性無咗，上述公司已經可能係銀行度借到錢，融資有法，能夠生存，又點止一兩倍PE呢，盈利又唔係跌九成九，但股價最少跌咗九成，回升係合理的。雖然我對內房股的銷售成績有保留，但就算真係有假按揭，受害的只會係銀行。
係正常情況之下，十倍PE的內銀股，應該絕少見到，唔知有冇人記得，中國銀行上市時，招股書寫歷史市盈率係二十幾倍，無記錯的話，依家十倍五厘息，不過中國銀行係六行之中貸款逾期三年比率上升得最快的一間，所以兩保一招都係比較穩陣啲，如果招行今年倒退係一成以內，明年係絕對會恢復增長。