存款準備金

公佈日期： 11/10　實施日期： 13/10
措施：中行、工行、建行、農行、招行及民行被要求實施差別存款準備金率，上調 0.5個百分點，為期 2個月

公佈日期： 10/11　實施日期： 15/11
措施：包括工行、農行、中行、交行和光大銀行在內多家內銀被要求差別上調存款準備金率 0.5個百分點，為期 3個月

公佈日期： 10/11　實施日期： 16/11
措施：上調 0.5個百分點，不計差別準備金率，六大銀行加至 17.5%，小型存款類金融機構加至 15.5%

公佈日期： 19/11　實施日期： 29/11
措施：上調 0.5個百分點，不計差別準備金率，六大銀行加至 18%，小型存款類金融機構加至 16%

公佈日期： 10/12　實施日期： 20/12
措施：上調 0.5個百分點，不計差別準備金率，六大銀行加至 18.5%，小型存款類金融機構加至 16.5%

加存款準備金對中行、工行、建行、農行、招行及民行的影響接近零，因為由10月13日開始兩個月的差別存款準備金率已經到期。至於加息，雖然數據比預期為高，但通帳預期亦未至於嚴重超標，今年極大機會都唔會再加，十二月都係得返十幾日^^，反而存款準備金可能仲會繼續上調。

觀察名單

大快活（0052）
由於估值方面比大家樂便宜，一直以來都比較偏愛大快活，兩家公司公佈業績後，大快活的股價比當初已經升值四成，而大家樂就接近原地踏步，從高位回落，大家樂要再增長只能靠內地業務，香港能保持佔有率已算係唔錯，最低工資加上食材價格上漲，無論係大家樂和大快活，未來要經歷高增長係好困難，反而係經濟周期逆轉時，食材價格下滑，增長反而比較容易。

惠理基金（0806）
基金市值創上市新高，今年下半年基金能收取表現費，而最近係跌市時基金亦跑贏大市，對金手指的能力絕對係寫個服字，自問炒作能力一般，不如投下惠理基金懷抱。

比亞迪

更多資料顯示，比亞迪（1211）11月份的汽車銷量比10月份有所增長，而汽車購置補貼方面取消的話，對比亞迪更為正面，新能源汽車方面的補貼持續，對銷售競爭力有所增加，而十二五係節能排減亦對比亞迪的儲電站和LED業務大有幫助。
對於比亞迪，汽車、LED、儲電站未來增長不容忽視，反而家電業務與個人電腦的競爭力真係有所懷疑，唔係對產品有懷疑，而係銷售能力，一開始只能進入入門級別，與進入汽車業務時一樣銷售低端產品，耐用消費品如何改變消費者的購買習慣係一大難題。
至於電池和手機代工業務，唔倒退已經係好好。
預測2011年比亞迪的汽車銷售會係70萬輛。

觀察名單

蒙牛（2319）
糖價上升係飲品股的死穴，蒙牛上半年業績受此影響，相信下半年都不能避免，同康師傅一樣加價係唯一方法，近來招股的現代牧業反而唔錯，若然定價唔高（相信都好難），都抽得過，牛根生復出，加上上游業務，前景應該幾好。

比亞迪（1211）
一早已預期季度業績差，新車推出，管理層對全年銷售仍具信心，達標的話會係大反彈，無論係新能源汽車、太陽能相關產業，只要油價上升，對比亞迪的發展會更為有利，畢竟中國的電價升幅永遠落後於世界。

ASM（0522）
公布了一個亮麗的業績，股價對業績完全無反應，相信係市場對收購西門子帶來疑問，的而且確，西門子之前出售的手機業務，亦未能為買方帶來任何益處，但現在ASM收購的唔係一個品牌，只係一個可以進入該市場的技術，能夠為客戶提供更全面的服務，付出的代價亦唔算高，成功的話相信可以由中型變做大型企業。

疑問

對於國有銀行追收不良貸款的能力，我總會有疑問，幾間國有銀行幾百億至千億的不良貸款，1年不到，就能夠追回百億以上，係佔不良貸款的十幾個百分點，反而招行和民行追收不良貸款的速度和力度真係遠遠不如，能收回幾個百分點已經算好好，反觀交行竟然上升，係咪交行計算不良貸款的方式如滙控一樣保守呢。
國有銀行不良貸款的清收處置如此良好，究竟係用咩方法追收，我真係好想知道，如果咁容易收返，當初又點會變成不良貸款呢。

令人遺忘的投資組合

組合現金結餘$360
收取
瑞房09年末期股息12仙
瑞房10年中期股息6仙
$1350
鷹美10年末期股息7仙
$700
中鐵09年末期股息7仙
$350
中海油田09年末期股息15.5仙
$300
組合現金結餘$3060

沽出
中國中鐵（0390）5000股
買入價6.38　沽出價6.15　現價6.19
中海油田（2883）2000股
買入價8.65　沽出價14.02　現價14.6
沽出後現金結餘$61,450

買入
比亞迪（1211）500股
買入價48.75元

世茂房地產（0813）2500股
買入價13.58元

瑞安房地產（0272）　7,500股
買入價5.15 　現價4.27

鷹美國際（2368）　　10,000股
買入價2.00 　現價2.84

組合市值$118,375
現金結餘$2,725

沽出中鐵，原因在於中鐵建的虧損亦有機會係中鐵身上發生，上市公司面對的政治風險，無可避免帶來虧損，就算能夠追回，亦都係不必要的麻煩。
沽出中海油田，估值已回復到適當水平。
買入世茂房地產，連碧桂園市值都超越了世茂，全年銷售有望達標，盈利有望創新高。
買入比亞迪，最壞時刻已過，分析指全年銷量難達標，但新車開始不斷推出，估計銷量有望達標。（11月應該要賣6-7萬輛）
組合嚴重跑輸大市>_<

註：投資組合由2009年6月29日成立。
　　初始金額為100,000元。
　　除股息外，不再有資金投入。
　　恒指當日收市價為18,600點，投資組合以當日最高價位買入目標股票。
　　所有股票以當日最高價確認買入，沽出以最低價確認沽出。
　　每次買賣手續費為200元。
　　持有挑戰自我的投資模擬組合部分股票

比亞迪

比亞迪（1211）第三季業績大幅倒退九成九，股價插水，初時估計比亞迪季度業績唔會好得去邊，但就估唔到差得咁緊要，不過，若然只係計賣車，第三季係差過第二季少少的，業績差原因，政府補助金減少一億，銷售、研發、行政和其他費用支出大幅上升所致，全部升幅都有三至五成，加加埋埋有成十六、七億，業績想好都唔得。
前景又點，除了銷售成本追唔上營業額呢點缺點之外，研發、行政和其他費用大幅上升，可能意味着比亞迪的電池產業鏈正高速發展，平板電腦、LED市場、家電和太陽能種種和電池有關的業務，未來一兩年會再一次經歷汽車產業的高速發展，而汽車業務的質量和服務問題唔好係其他業務再度發生。

中遠國際

近來內房股股價突破橫行，連瑞房股價都突破4元，惟獨遠洋地產（3377）被點穴，相信與中遠國際（0517）要盡沽遠洋地產股份有關，或許已經正在沽貨，大部份分析都指中遠持有的遠洋地產市值等同中遠國際市值，投資價值極高，不過，管理層早前透露，會用所得資金收購母公司資產，而我估計會用餘下資金用作減債，加上中遠國際的派息一向偏低，希望收取特別股息的投資者可能會失望，而投資價值，則取決於收購資產時的作價與未來能否產生穩定的盈利。
至於遠洋地產，恐怕要等中遠國際盡沽持股才有運行。

觀察名單

港交所（0388）
港交所股價隨成交突破升億股價不斷向上，同公布中期業績時走勢淡靜不可同日而逾，由於股價上升，現價安全值相對下降，股價波幅與股市波幅關連極大，由於不斷有新公司來港集資，相信就算再來一次熊市，未來成交額維持係六至七百億會相對容易，對港交所盈利有穩定作用。

比亞迪（1211）
股神訪華令比亞迪股價持續走高，若然股神續持相信會更加不得了，不過第三季業績應該唔會好得去邊，未來前景，係電池業務的產業鏈應該會愈來愈多，王傳福講過當有盈利就會分拆上市，汽車業務離上市之期應該不遠了。

中銀香港（2388）
香港和內地估值最貴的銀行股，貴得有道理，今年盈利增長其實有數得計，貴在人民幣業務究竟能產生多少盈利，唔知道先有得炒，不過應該唔會太多，循序漸進未來收益應該會不斷增加，但預期市盈率已接近廿倍，同被受冷落的內銀股便宜估值，係慨念有得炒同無得炒的分別。

內房股
內房股持續受政策打壓，一次力度比一次大，但下跌幅度一次比一次少，今次的調控可能會有利內房發展，樓價平穩不大幅上升的話，對有大量土地儲備和待售物業的內房股最有利，以量取勝。

利和經銷（2387）
私有化成功，但由於可以換股唔收現金，相信都唔會有人收現金21元，現價23.95元，利豐股價升跌係未來一段時間對利和影響會好大。

中移動（0941）
繼續維持全年業務增長一成，每戶收入下跌空間愈來愈少，經濟好轉因素對中移動亦有利。

領匯（0823）
一間持有得愈奈風險愈低的股票，股息收入四厘唔算高，但股息能維持每年15%增長，應該有好一段時間，總好過買銀行的新類型產品或者人債。

內需股
估值愈來愈貴，增長愈來愈少，康師傅（0322）和恒安國際（1044）的PEG都高於1以上，真係買唔落手，李寧（2331）估值反而唔算太高，但李生近日的財技反而幾高。

大家樂（0341）大快活（0052）
大家樂好似創咗歷史新高，估值係大快活一倍，安全性方面反而大快活高一點，當然經營效益方面係大家樂勝一籌先可以享高估值，但係食物味道方面兩間其實已經無乜分別。

招商銀行（3968）
招行發盈喜，其實盈利好係正常，就算之前對銀行業所有不利消息，其實都唔係新鮮事，對撥備、資本、地市政府融資、利率市場化、而樓價下跌又或者經濟下滑做成的壞帳，以上所有都係銀行永遠面對的問題，要驚恐怕所有行業都會有一定風險，事實上，未來幾年銀行的盈利只會有增無減，監管只會對銀行未來發展更為有利。

碧桂園（2007）
下半年盈利應會更佳，回購可換股債有助盈利，股價回升令對賭協議對盈利做成的虧損減少，甚至會有盈利，售樓收益有增無減，打擊樓市對碧桂園影響輕微，平均售價以呎計，係幾百元一呎，以內地來講絕對係上車盤。

200元

若然中人壽去到每股200元，需要幾奈，唔知道，但以市值計算，大約係5萬幾6萬億，以盈利計算，賺到3千億以上算係合理，係依家的10倍，以2倍內涵價值估計，現時內涵值約每股11元，200元股價即係要每股內涵值達100元，起碼要15年以上時間，唯一能令時間縮短的是人民幣升值。

銀行業

銀行業近來的種種傳聞，基本上都冇有利消息，投資內銀股就好似點穴一樣，停滯不前，的而且確，若然有一樣傳聞落實，對內銀股的盈利會造成極大不利影響，只係2.5%撥備率一樣，撥足的話已經可以叫內銀今年盈利增長放緩，能夠達標的只有農行，唔只達標，農行直頭超標，有3%，但達標有何意義，由於壞帳極多，先要撥咁多，不良貸款覆蓋率連150%都達唔到，若然招行和民行達到2.5%，不良貸款覆蓋率係會達到400至600%以上，係過度撥備。
利率市場化反而未至於太擔心，但市場最怕的就係呢樣，相信實施初期，都會有所限制，有競爭係在所難免，但最惡劣的環境下，現在香港銀行的息差都有1.幾厘，與內銀的2.幾厘息差比較，有成1厘的差距，以國有銀行為例，1厘講緊係幾百億盈利，市場擔心有理，但處理壞帳最好的方法，除了係撥備之外，提高盈利能力亦係一個方法，估計利率市場化就算真的落實，都係會循序漸進的實行，唔會一次過完全開放，對內銀未來的增長只會減慢，而係利率市場化之後，國有銀行係面對中小型銀行和外資銀行的競爭會愈來愈激烈，除了網點之外，優勢會愈來愈少。
內銀盈利預測方面，係平保賣平安銀行時，好似有保證未來三年平安銀行年增長三成的協議，而深發展亦預測增長兩成以上，相信整體銀行業增長都會不錯。
而市場傳聞的中國版巴塞爾協議，可信度係有，但就絕對唔會係今年內發生的事，內銀股今次集資潮，相信與中銀監有一定溝通，而以大部分內銀所講，三年不集資推測，就算真係有中國版，亦都會係三年後的事。

K11

新世界發展（0017）一向唔係地產股的首選，不過K11的成功令我改觀，K11絕對比得上新地和恒隆的商場項目，若然K11模式係內地複制成功，新世界係內地發展係唔會差得過恒隆，不過恒隆有先行者優勢，一早係內地投資，而新世界的第三代鄭志剛，相信唔只會係繼承人，未來會令新世界「進化」，K11只係開始。

平保

平安公布業績後股價大幅上升，業績各方面都比其餘兩保優勝，加上取得深發展控股權，以今日深發展預期盈利76億元計，平安大約佔38億元，比平安銀行的估計全年盈利多出20億元，只係付出20億元現金就換取20億元盈利，實在非常化算。
壽險業務的估值，相信大部分已經反映係股價中，而銀行方面反而比較特別，若然平保係銀行業務的估值若然跟隨同業，以現時內地銀行股的估值，實在不能用高估值來形容，大約只係5至15倍，傳聞對銀行業資本的要求不斷提高，未來平保係深發展需要資本的方面，應會付出不輕的成本，對償付能力會做成一定壓力，可能唔使幾奈，又會有平保巨額集資的傳聞出現。

金融股

宏利金融（0945）
昔日股王，要重上高峰，取決於加息時間，暫時只會有波幅無升幅。

內地銀行股
息差最高的係民生銀行（1988），若然不計算上年賣海通證券特殊收益，盈利增長最強的亦係民生銀行，達1倍以上，民生相信會係當日未買永隆的招行，未來幾年盈利增長會異常強勁，只係貸款分布方面，民生房地產開發商佔比較多，至於資本方面，相信靠保留盈利已經可以達到自給自足，以今年盈利150億元或以上，派息比率兩成的話，可保留130元盈利，明年賺200億以上的話，保留盈利可以更多，只要未來再交出驚喜業績，市場必定會重估民生。
招商銀行（3968）基本上市場正擔心的銀行壞帳、地方政府融資、信託貸款納入資產資債表，對招行的影響全都有限，係估值上已經可見招行係一支獨秀，當日買永隆的決定係無做錯，至於資本方面，都係靠保留盈利，三年唔集資承諾必會做到。

內地保險股
保險股中期業績不見突出，最突出的可算係平保（2318），不過若然計算埋上年補稅方面所扣除的8億盈利，平保其實只係多賺接近兩成，而且係已實現的損失方面，可供出售金融資產方面，有14億虧損，令總投資收盈方面較太保或人壽失色，收購深發展股價大升，係市場認同的表現。係銀保方面，相信未來收盈會較太保或人壽有更強盈利，用深發展網點銷售，與深發展分享利潤係太保和人壽所不能做到的。
至於中國人壽（2628）方面，保費收入處於行業平均線之下，加上投資收益下降，業績有增長算係唔錯。
中國太保（2601）中期業績增長不錯，係上年度低基數關係，不過保費增長強勁，產險控制成本得宜，兩倍內涵值係唔錯投資對象。

保險股由於會計準則的改變，盈利提前實現之下，加上內涵值的基數擴大之下，未來內涵值的增長將會放慢，年增長兩成內涵值對中人壽有開始會有難度，減少派息會係其中一個方法。
我經常都有一個疑問，若然內涵值增長低於三成，中人壽以三倍內涵值的估值，有龍頭股溢價，股價上升動力其實係唔足夠，惟一上升動力係A50之外的A股相關系數股票。
太保和平保相信未來跑贏中人壽的機會相當高。
雖然根據歐美經驗，GDP增長到達某一階段，保險銷售的增長會加速，分折總提到人富了就會買保險，但在中國，比香港加更貧富懸殊之下，以平均月薪二千元以下的勞動工人為例，以工資年增長兩成以上，究竟要幾多年，工人先會感覺到自己富有，需要買保險呢，內地保險毋疑滲透率低，所以每次天災，幾本上所賠款比例都很少，係農村、山區，究竟要幾多年先會有意識，有能力去買保險呢。保險股雖然增長空間龐大，只有係安全方面係較銀行股優勝，從估值方面和派息方面看，未來內地銀行股升幅潛力會較保險股優勝，但只限於資產質數優良、盈利能力和風險管理能力較好的銀行股。

十個趣

利豐（0494）以現金價每股21元私有化利和經銷（2387），私有化價較利和經銷停牌前的15.42元溢價36.2%，股東亦可選擇股份計劃，每一股利和經銷股份可換取0.585股利豐股份，只可以二擇其一。收購價較利和去年底止綜合資產淨值為4.15元，高出4.06倍。
利和現在的收市價係22.1元，比私有化價格高幾個百分點，就算工行私有化工銀亞洲，一日未經股東投票落實，股價比私有化價錢都還有折讓，但利和竟然比私有化價錢有溢價，係想利豐提高私有化價錢，定想私有化失敗，真係要買嗰個先知，利豐出價其實真係唔錯，04年12月上市招股價係3.5元，過去亦有穩定派息紀錄，私有化價錢對所有股東都有交代，而係21元以上買入的勇者，若然私有化失敗，就真係十個趣。

比亞迪的未來

比亞迪（1211）股價近期處於弱勢，短期方面，係受到新車銷量放緩，內地工資上漲，以及新能源汽車銷售廖廖可數因素所影響，股價弱勢其實已經反映咗。
長遠而言，係遙遠的未來，比亞迪應該係一間銷售電池有關連產品的綜合企業，只要同電池有關係，比亞迪都自行研發，自行生產銷售，由之前不是主業的汽車開始，之後會係家電、電腦、太陽能面板、儲能電池以及LED節能燈，近日與比亞迪與KB Home公司合作建設的新能源住宅項目只係一個開始。
分析員係比亞迪進入汽車業務時睇淡，現在比亞迪想發展家電業務亦一樣睇淡，歷史再度重演，有人話股神係睇中比亞迪的新能源環保汽車，我反而覺得係睇中比亞迪領先的電池技術和發展電池業務周邊產品無限伸延的能力。
係手提電腦方面，若然比亞迪的電池能連續使用八至十小時，而又做到又輕又薄的話，發展個人電腦銷售真的完全無問題，因為作業系統和CPU基本上大部分消費者都係微軟和英特爾，惟一需要的係要時間建立品牌。
唯一令我感到奇怪的是，比亞迪最有能力發展而不想發展的係手提電話業務，可能因為比亞迪電子最大的客戶--諾基亞的關係。

農行

沒有認購農業銀行，主要係沒有認購價值，有多餘錢會多買招行，投行係推介農行方面，以農村網絡優勢作賣點，用二十、八十定律，究竟係擁有二十優質客戶的招行，定係八十農村客戶的農行優勝呢！
不良貸款方面，係四大國有銀行中，農行佔了一半，又一優質賣點。
地方政府融資平台方面，係四大國有銀行中，農行相信又係稱冠，一旦出現問題，集資所得應該會化為烏有。
農行惟一賣點，相信係改善營運效率。

觀察名單

領匯（0823）
公布了意料之內的業績，係市況淡靜之下，股價持續向上，繼續維持未來五至十年，每年盈利和派息平均增長15%。

騰訊（0700）
對於近期股價下跌，市場有不同解釋，但就算真的增長放緩，相信仍會係其他企業所難見到的高增長，而且競爭對手盈利下跌，向好處想，騰訊市佔率反而有上升可能，三網融合對騰訊的影響是好是壞其實係未知數，而且互聯網用戶的增長比移動電話的空間大很多，QQ可以話係不可複制的模式，反而將推出的網絡遊戲用戶反應好壞，對未來盈利增長有影響。

港交所（0388）
以往認為港交所唔屬於增長股，但係金融危機下，每日平均成日額六百幾億係幾年前的一倍以上，隨著更多大型企業來港上市，加上企業市值不斷增加，相信十年之後，每日成交金額會係幾千億成交，而港交所最難得係派息比率達九成。

比亞迪（1211）
新車銷量隨著產能見頂，加上銷量放緩，已經難以保持每年一倍以上銷量增長，再加上富士康事件，工資急升之下，今年盈利增長，係股價上已經充份反映。

碧桂園（2007）
係內房股中，除了瑞房和世茂之外，近日比較關注的係碧桂園，近半年銷售金額132億，只係半年，已經接近上市以來年的全年銷售紀錄，而股價比上升以來亦腰斬一半，全年銷售金額或會達250億元，而現價市值只係350億元，息率係內房股中係中上，相比起初上市的千億市值，現時投資價值顯然更高，而且近來內房股板塊係跌市中表現出抗跌力，相信現時已經反映樓市下跌的壞情況，今年碧桂園盈利相信會創出上市以來新高，係二、三線城市發展早着先機，未來前景值得看好。

瑞房（0272）
下半年瑞房會有大量樓盤推出，今年銷售由於缺少上海翠湖天地，相信會以量補價，達到預期60億的銷售金額，業績唔會有驚喜，反而主席早前增持，而以股代息又係低價，但瑞安建業又以低價售股賣瑞房權益俾母公司，這點值得留意，三年計劃，維持係明年開始會係收成期。

鷹美國際（2368）
盈利跌減派息，股價大跌，盈利下跌因外銷增加令稅率上升，加上工資上漲，係盈利下跌原因，但現價已反映大部分不利因素，今年以外補內，係江西廠房投產後成本會下降，盈利必會回復增長，現價股息率達9厘，股價弱勢中，若跌至2元水平，10厘股息估計有一定支持。

招商銀行（3968）
盈喜預期業績增長五成，相信未來幾年盈利複合增長超過三成係沒有難度。

中國人壽（2628）
保監會上周發布《關於人身保險預定利率有關事項的通知（征求意見稿）》，由於中國人壽傳統保單比重較大，股價急跌顯示市場認為此政策對中國人壽有不利影響，亦提供了一個買入機會，會唔會有退保潮，相信不會，投保人係唔會因為收盈上升而放棄供了多年的保單，放棄就真的蝕了，高利潤保單將來利潤係會減少，但薄利多銷，畢竟市場仍然龐大，而投保人係選擇保險公司方面，全國性而執行能力高的保險公司其實唔多，近百萬的營業員不單有利銷售，係服務客戶方面，係外資保險公司絕不能提供的優勢。

加息

受歐洲債務危機影響下，美國今年加息機會大減，美國出口或會受到歐元貶值所影響，貨幣貶值用來刺激經濟，美國用了、歐洲多國被動式用了，惟獨是中國用不了。
今年人行加了三次存款準備金率，若以過往加息手法，第三次就係加息而唔係加存款準備金率，相信係人行希望延遲加息而令人民幣升值壓力減少，而中央亦用政策令樓市資產升值壓力減慢，銀行相繼取消七折利率，二套房的利率更加係大幅提高，部份銀行樓按只有首付比率達四成的才享有七折或八折利率，而且貸款人要從未有不良紀錄才能申請，所以內地銀行才能夠承受樓價下跌三至四成，係利率未上調下，但內地銀行的利息收入卻不斷提高。
內銀股的盈利能力不斷提升，今年經營將會係重質不重量，係國有銀行收緊樓按下，招行和民行房貸利率定價能力提升，對經營相當有利。
中國今年最多只會加一至兩次息，加息無礙保險股有利，但內銀股係未加息的情況下，利息收入己經不斷增加，係估值如此低殘之下，我只能盡力而為，買~~~

樓市

內地和香港都不約而同推出政策壓抑樓市，兩地地產股都受到影響，香港方面，所謂政策，其實只係作為一個消費者應有的權益，係一早應該享有的權利，無乜邊條係真係打擊樓市，就算市建局和港鐵的供應增加，價格亦唔見得會平。
如果政府真係有措施要發展商供應多啲細單位，相信類似縉庭山呎價近六千的二百八十呎單位可能會愈來愈多，而市建局限制發展商的措施，係強制收購舊樓由九成降至八成之後，發展商亦唔一定再同市建局合作，所以係現水平香港地產股係有一定投資價值，兩位李先生都係度買緊。
而內地調控樓市，係一招比一招重，樓價真的下跌的話，相信亦唔係好多人想置業，此情形同香港係一樣，樓市只係近幾年才回升，基本上要置業，買平貨係早幾年係好多機會，多數人係樓價下跌時多係觀望，而係上升時亦係觀望，而唔係真係考慮居住需要，真係有居住需要的話，只要係能力能夠負擔，就應該買，股票亦係，只要覺得未來能夠取得理想回報，係下跌時更一定要買。
對內地樓市最理想係房格穩定上升，如果人均工資每年能有一成半至兩成的增幅，樓價年升一成係可以的，係香港已經證明係無問題，現在置業難多係因為工資升幅係低單位數字。
內地地產股投資價值係有，但短期上升空間真係睇唔到，雖然調控不斷，不過樓市對經濟的推動力係不少的，而中央亦明白，樓市下跌力度若然過大，連鎖效應之下，對經濟的打擊係不容忽視的，所以我認為調控只係換取時間，唔係真係想殺死樓市，因為樓市上升，買唔到樓的人會有怨氣，若然樓價下跌，買咗樓的人亦會有怨氣，所以只要唔係失控的上升，內地樓價係可以上升的，對內房股亦係最理想的結果。

危機

大跌係買貨的機會，亦係將垃圾股換馬優質股的時候。
經濟復甦唔會因歐洲危機而改變，如果會，咁投資者所擔心的加息、收緊信貸和通脹應該都唔會發生。
有人會話係金融海嘯第二波，但由美國所引起和歐豬五國所引起的，級數真係唔同。

民行09年度業績

民行09年賺121億元，扣除海通證券獲得盈利，全年賺83億，比前三季大幅減少，今年民行經營目標140億元，若果經營目標能達成的話，增長接近七成，相信會係今年內銀股營利增幅之最，而扣除海通證券的盈利83億元計，19倍PE係七行之冠。
貸存比率78%，超過75%的警戒線，不過已經比之前八成以上好得多，貸存比率降低係末季盈利減少原因之一。
成本收入比率係扣除海通證券特殊盈利之後超過五成，而今年將會回落，但在中資銀行仍著重利息收入，係加息或減息周期，成本收入比率可以係無意義，加上不斷開設分行之下，未來難以大幅下降。
資產減值損失雖然回落至53億，比08年65億元大幅減少，但比起過往約22億元，未算大幅回落。
係不良貸款方面，關注類貸款下降1個百份點，由2.5%下降至1.5%，係好事，雖然整體不良貸款下降，但損失類貸款餘額增加約9億，有惡化迹象。
而信用卡6個月以上不良率為2.46%，同招行一樣，係信用卡方面不良貸款的容忍度較高，為了信用卡的高收益率而令不良率提升究竟係好事定壞事，將來會知道。

招行09年度業績

招行全年業績比預期中遜色原因係營業支出係最後兩個月大幅上升，係前十月經營支出只係203億，但全年支出係262億，比平均數多出20億，係未能達到200億盈利的原因，睇來管理層看到危機過後，恢復擴張發展步伐。
成本收入比率係44.45比上年上升7.9%，今年只要淨息差上升，收入快過支出會令比率下降，若要成本收入比率長年維持低水平，就要向香港銀行學習，以恒生為例，由於用自有物業經營網點，係支出方面會大為減少，而招行262億營業支出有19億係租賃費用。
供股完全有助淨息差上升，畢竟上年發行的次級債利率成本偏高，係上年淨息差受壓原因，而股東資金係零成本。
非利息收入佔整體收入 22.25%，手續費和佣金收入其實與上年相差不大，上升主要係其他淨收入大幅上升，係期內有可供出售金融資產獲利，當然，非利息收入整體上升只係淨息利收入下降所致。
值得留意的是信用卡應收賬款大幅上升兩成五，而信用卡不良貸款由8.74億上升至11.16億元，不良貸款餘額97.32億，有11.16億係來自信用卡，真的有需要嚴格控制質量，要重質不重量。
招行係證券投資方面大多選擇長期持有，係前十大證券裏面，港交所、中行、建行、恒生、中銀香港、冠君產業信託都應該係上市持有至今，當中港交所、恒生更係升值百倍，反而工行、中煤和滙豐從買入價所見，係近期買入的投資，而證券投資有一間比較奇怪的是東方銀座，帳面蝕咗三成，完全和本身投資風格唔協調，估計有可能係抵押品，真係靠估，不過從中所見，招行係證券投資的股息收入係非常可觀的。
招行係信用貸款方面，佔整體貸款的22.8%，比上年下降3.79%，在去年經濟下行風險增加的市場環境下，招行更加重視以押品作為風險緩釋的重要手段，2009年末抵押貸款佔比較上年末提高5.89個百分點，係無押品的信用貸款中，招行係內銀中應該係最低的，而工行就最高，至於交行年報中無顯示。
由於上年度多提所得稅有10億調整回撥，加上持有政府債券大幅上升超過四成，而國債所得收入可免除企業所得稅，免稅收入有接近4億，令實際稅率下降3.18%至18.54%。

招行

鑑於上述未獲認購之H股供股股份不足以滿足所有將零碎股權補足至完整買賣單位之額外申請，董事會已決定按比例分配各額外H股供股股份申請人所申請之額外H股供股股份數目，並盡可能參照彼等所申請額外H股供股股份之數量作出分配。

經歷滙豐供股一役，證明唔供股係一個唔明智的選擇，所以今次招行供股比例超過九成八，額外供股更加係超購三倍，令到額外供股分配方式改變，真係吹~~~~~~脹。

轉勢

內銀股陸續公佈業績後股價走勢開始轉好，尤以交行（3328）、建行（0939）表現最強勁，招行（3968）雖然未公佈業績，但若交行的淨息差回升所見，招行絕對會受惠息差回升，股價更創出一年新高。
從交行和建行的業績所見，提高了撥備覆蓋率令第四季盈利受到壓縮，亦令到今年的增長會更為強勁，派息比率雖然減少，但息率其實比滙豐都唔差得好遠，相信再過一兩年息率會高過滙豐一啲都唔奇，若然現在滙豐用相同派息比率，股息應該比內銀股還要低。
內銀股只有招行完成供股，其他如工行、建行和交行等都要相繼集資，但從現在的升勢看來，之前一直受壓的理據簡直不攻自破，不過，內地加息真的為時不遠，每一次加息都會有理由令股價受壓，同時亦都係收集的好時機。

中海油田服務業績

營業收入
2009年，營業收入達人民幣18,345.4百萬元，較上年同期的人民幣12,430.3百萬元增加了人民幣5,915.1百萬元，增幅為47.6%。其中，鑽井服務業務同比增加人民幣4,096.4百萬元，主要原因是並購的CDE全年運營、新增裝備的高效使用（COSL Confidence、COSL Strike、2台陸地鑽機），以及COSL942與3台陸地鑽機本年全年運營。
2009年受益於CDE 5條鑽井船回國作業的影響及國內大型裝備的增加，本年來源於國內地區的收入達到人民幣13,356.4百萬元，同比增幅42.3％。海外收入（含確認的遞延收益人民幣1,073.1百萬元）達到人民幣4,989.0百萬元，同比增幅63.9％。

營業成本及毛利率
2009年集團總營業成本達到人民幣11,688.9百萬元，較去年同期的人民幣7,929.9百萬元增加了人民幣3,759.0百萬元，增幅為47.4%。主要原因是隨著CDE的全年運營、工作量的增加、部分新裝備的投入使得本年折舊費、物料燃料消耗、人工成本、以及分包費、租賃費等有所增加。

財務費用
2009年集團的財務費用為人民幣868.1百萬元，較去年同期人民幣366.1百萬元增加了人民幣502.0百萬元，增幅137.1%，主要原因是受利息支出增加和利息收入減少的影響。利息支出增加主要原因是隨借款增加而增加利息支出約人民幣398.7百萬元。主要有①集團收購CDE借款22億美元本年全年計提利息（去年僅計提3個月利息）。②集團為補充營運資金及建造利比亞陸地鑽機新增17.5億人民幣借款。③隨著本期10條工作船及2條鑽井船建造完工，1億美金債券、5億挪威克朗債券和15億人民幣債券的部分利息停止資本化轉而計入利息支出，使得利息支出增加。

資產減值損失
2009年集團的資產減值損失為人民幣879.4百萬元，較去年同期人民幣159.5百萬元增加了人民幣719.9百萬元，增幅451.4%，主要是受宏觀經濟環境及其對行業的影響，以及三條在建半潛式鑽井平臺延期交付等原因，管理層根據會計準則要求對有關資產進行了減值測試，並根據測試結果確認了資產減值損失人民幣819.9百萬元。

所得稅
2009年集團的所得稅淨支出為人民幣624.3百萬元，較2008年的人民幣205.0百萬元增加了人民幣419.3百萬元。其原因一是集團收入規模擴大；二是去年同期本公司獲得2007年度高新技術企業優惠稅金返還人民幣524.0百萬元，而2008年本公司按高新技術企業所得稅優惠稅率15%計提和繳納所得稅，故本年無高新技術企業優惠稅金返還。同時，由於本年本集團多在低稅率國家作業使得海外收入對應的所得稅減少約人民幣180.0百萬元。

淨利潤
2009年度，集團的稅後淨利潤較上年同期的人民幣3,102.2百萬元增加了人民幣33.1百萬元，達到人民幣3,135.3百萬元，增幅1.1%。


中海油田服務業績比預期中差的主要原因並唔係資產減值損失，資產減值係中期業績經已出現，主要原因係所得稅方面，本年無高新技術企業優惠稅金返還所致，另一部份係利息開支大增，不過係無可避免，此乃收購挪威同業而造成，所以集資係遲早問題，而集資亦唔係一件壞事，其實市場對呢份業績應該係滿意的，只係我個人對業績預測過於樂觀而有點失望。
不過，經營環境向好係不變的事實，只要首季業績令市場相信回復增長，估值仍有上升空間。

思捷估值亦在不斷提升中，連之前不斷減持的Capital Research and Management亦增持返思捷，相信市場估計今年應該係會恢復增長，雖然唔知係高增長定低增長，不過思捷暫時難以加入觀察名單裏面。

霸權

係奧巴馬競選總統時，曾經問友人一個問題，究竟邊個做美國總統最好，友人的答案係--布殊。
友人話可惜布殊無得再做，如果可以的話，希望布殊可以永遠做落去。
友人之所以希望布殊做總統，係因為美國係布殊領導之下，可以話衰咗八年咁奈，而中國就係呢段時間高速增長，就係因為布殊唔係做總統的材料，先係總統最佳人選。
金融危機對中國匯率可以係最穩定的一段時間，但危機一過，美國又以各種方法向中國施壓令人民幣升值，連香港都可以係操控貨幣國家，看來除了美國之外，所有國家都在操控貨幣，只有美元唔係貨幣，而係一張廢紙。
中國會慢慢變得更強大，係美國所不願見到的事，就算知道升值無助美國解決問題，都要人民幣升值，拚着打貿易戰又或者兩敗俱傷的情況下，都要係對手未變得更強大時摧毀對方，要人民幣升值四成，想用解決日本的方法對付中國，成功的話，香港都無運行。
中國所持有的美債係最佳武器，就算唔減持，只要唔再增持就可以，就由日本做最大債主好了。

招行

招行係供股章程裏面其實披露了2009年10月份的營運數據，雖然已經係過去，但由於全年業績尚未公佈，10月份的營運數據可為全年業績帶來啟示。
08年全年賺211.77億人民幣
09年中期賺82.62億人民幣
09年首三季賺130.78億人民幣
即第三季賺48.16億元

09年10月31日止四個月賺78.88億元
即09年10月賺30.72億元
如果09年餘下兩個月能有此成績，全年業績可能不會倒退，還可能有輕微增長。

不良貸款總額覆蓋率係248.75歷史新高。

相信供股章程都無人有興趣睇，但若想額外供股而獲優先處理，其實係有秘訣的。


秘訣就是只有申請不足一手的碎股會獲優先處理，此基制乃為將不足一手之零碎股權補足為一手完整買賣單位之股權而作出。
雖然不足一手的碎股唔算多，但能夠以10.06元額外認購，簡直係超值。

神話

以前長揸匯控會致富，但同一條方程式現在已經不適用，內銀股和渣打比匯控的投資價值更吸引，但係咪代表匯控已經唔可以長期持有呢，答案有兩個，係同唔係，對唔同人有唔同答案。
六合彩歷史以來，咁多次頭獎，我都未識到有朋友中個，又或者中獎的都唔會話畀人知，但長揸匯控致富的神話，原來身邊「有人」做到，匯控最高增長期持有到現在，都有廿年，期間不斷慮績直至現在，期間經歷多次股災。
對我來講，係會取內銀棄匯控，但對有人來講，繼續長期持有匯控係最合適，原因係唔認識其他股票，亦都唔識甚麼是基礎分析和技術分析，股票知識係零，所以一動不如一靜，對有人來講係最理想的投資方法，縱使其他股票回報比匯控理想，亦都繼續持有匯控，但由於量夠多，匯控雖減派息，但回報仍然非常理想，以股代息亦足夠每年買多好多手匯控，股票持有的量其實都好重要。
近年的神話應該係騰訊，但一隻升幾十倍的股票，由招股持有到現在的回報係極驚人，如果持有量極多的話已經可以退休，但一隻新股，作為一個散戶，要持有直至現在都唔係一個問題，係最初能夠有信心買幾多，應該無人All In啩。
中人壽能去到紅底股的話，亦會係另一個神話，中人壽無疑係極之穩健的投資，不過現價買入與招股價能夠買入的量相差極遠，招股價買入當然可以長揸，本小利大息高，但由於中人壽係人所共知的好股票，股價估值存在溢價，兩倍內涵值以下的中人壽除了上市時，就只有金融危機時見到，除非擁有大量現金，否則現在買中人壽的能買到的量唔會好多，長期持有會係本大息低，獲利多與少在於紅底股是否極限。

觀察名單

大部份觀察名單都未公佈業績，相信大部份都係預期之內，並唔會帶來驚喜。

中移動（0941）
中移入股浦發行並未影響今年盈利恢復增長的看法，投資浦發行長遠回報還會不錯，不過相信唔會再係組合之中。

招商銀行（3968）
供股後應該三年都唔會再集資，上一次承諾兌現，希望今次都一樣，相信今年係回復高增長的一年。

民生銀行（1988）
今年唔會再有特殊賣海通證券特殊收益，但民行內部預期盈利會有140以上，盈利唔計算賣海通證券，增長應該會接近四成，之前大市下跌竟有分析員認為民行都有集資需要，我都無話可說。

瑞安房地產（0272）
繼大連之後，上海投地都有收獲，今年唔會係豐收期，但未來兩年開始會步入收成期。

中國平安（2318）
投資富通終於有股息收，今年保費收入增長理想，只要唔好再有富通呢類龐大單一錯誤投資，紅底股指日可待。

中國人壽（2628）
同平安一樣，未來五至十年增長前景可見度高，純以股價論，平安係抵買啲，而且係牛市中平安爆發力較高。

中海油田服務（2883）
中海油增長資本開支，油價係80元水平，加上新增產能，最重要係現價估值都唔算貴，如果盈利同預期中一樣有兩成以上增長，上升動力應該非常充足。

鷹美國際（2368）
今年盈利都會有理想增長，惟一難預計的，係中美貿易戰下紡織股會否成為犧牲品真係唔知道。

中國中鐵（0390）
中國鐵建已訂下盈利增長50%目標，相信中鐵增長都唔會差太遠，經過兩年消化上市時的高估值，而且增長高峰期未過，今年絕對有重估可能。

世茂房地產（0813）
之前大市下跌時所作的投資，純以恒大（3333）市值作比較，恒大上市時市值升至七百幾八百億，但無論銷售、財務狀況和管理世茂都較恒大出色，市值比恒大少實在唔合理，現在恒大下跌、世茂回升，兩者市值都係五百幾億，恒大回歸基本，世茂回歸合理。

匯豐（0005）
匯豐的業績與渣打比較，與內銀股比較，都沒有優勝之處，內銀股要集資，匯豐亦期待盡快回內地上市，其實都係集資。

領匯（0823）
TCI沽售限制了升幅，但未來業績應會有一段漫長的增長期，需未至於高增長，但比匯豐的業績容易令人明白，業務勝在簡單，討厭領匯的人更加要買。

康師傅（0322）
中國旺旺公佈了勝預期的業績，康師傅或許會有驚喜，不過股價已經反映了。

李寧（2331）
公佈了業績，今年受惠經濟復甦，同店銷售會增加，盈利增長應勝去年，業績後股價升超過一成，而買李寧比蒙牛買得安心，係唔會有三聚氰胺事件發生。

比亞迪（1211）
業績好到唔可以再好，但今年要面對係產能面對不足問題，近年新車每年銷售目標都係一倍，今年未必可以再做到，應要再擴大生產線，而今年原材料價格比上年會上升不少，毛利率或會輕微下跌。

通脹

M&M係7仔同K仔都加價啦，細包裝賣9蚊，9蚊係一年前，係7仔同K仔減價時可以買到兩包，現在加幅近五成，開頭真係以為打錯價錢，近年唯一無加價的只有報紙，朱古力的加幅就唔會比麥記少。
因為工作的關係，近年好少食到早餐，起身股市都半日收市，但早兩日去咗大快活食早餐，條人龍真係長到不得了，店員的速度都已經係高速，但都要等咗十分鐘先有嘢食，比起幾年前食過的一次有進步，心想大快活真係買得過，之前只係純以估值作為參考，現在試過味道真係唔會差過大家樂好多，之前七個幾係平，依家八個幾都唔算太過貴，如果唔係有太好選擇，真係想買返少少。

達拉斯小牛依家十二連勝，Jason Kidd係職業生涯最後階段的展現最後光芒，繼魔術手莊遜之後第二個食出超級大三元的球員，成隊波狀態大勇向13連勝進發，不過球隊尚欠一個防守專家，NBA總冠軍之路極之困難。

簡單

雖然匯豐除稅前盈利大幅增長56%，但匯豐的業績受會計準則影響，接近零增長，現在的匯豐以股息和增長潛力計，是比內銀股遜色，上年我預期匯豐的業績能有一倍的增長，是過於樂觀，但歐美與中東危機令撥備上升，係之前估計不到的，宏觀分析不足係原因，不過相信未來匯豐會受惠加息週期，令盈利提升。
要令分析準確，需要多方面資訊來修正，季度業績其實好重要，匯豐要係內地上市，將來定要發布季度業績，其實現在內銀股的透明度係比匯豐還要好，內銀業務簡單，主要業務接近八成或以上的收入來自放貸，非利息最好的銀行，收入亦只佔兩成左右，而內地每月公布新增貸款額度，加上內銀會公布季度業績，內銀需要控制的只有貸款質量。
現時的匯豐業務偏布全球，其實有好亦有唔好，可以講邊個國家出事都關匯豐事，非利息收入業務比重大，亦令業務過度複雜，過去歐美出事的銀行，亦係由非傳統貸款業務所引起，希望唔會發生係匯豐身上。
我認為匯豐未來向好，但年增長兩成係有困難，還要面對美國或會收取的「金融危機責任費」，雖然就算不大，但感覺就好似被人搶錢，投資價值真的比不上內銀股，甚至連領匯也不如，係派息增長和股價升幅，相信係未來五至十年領匯都比匯豐出色，領匯的業務勝在簡單，加息週期加租、減息週期再加租，經濟好加租，經濟差都要加租，總之就係加租。

性格

曾經聽人講，學習最容易吸收的方法係乜都唔識，一張白紙寫甚麼上去都可以，寫滿字的紙只會愈寫愈亂，係投資方面未必完全一樣。
係市面上有好多投資書，但無論係方法或者理念，其實都係大同小異，睇一百本同睇幾本係無分別，以股票投資為例，分析方法係絕對唔會再有隱藏招式無人知道。
正確的股資理念，唔一定會有會帶來成功。不論係買入持有或者係追隨趨勢買入強勢股，唔同個性會為投資帶來唔同結果，我以往對炒賣的人有點不肖，但現在已經改變， 投資目的係走向財務自由或者獲利，目的其實都係賺錢，長期持有錯誤的投資，不如投機還好，因為持有的唔係優質股，簡直係浪費時間，身邊有奇怪二人，奇人投資習慣係買平貨，長期持有的股票係八號仔，買入價4-5元，現在還不斷買入，仲宣稱係價值投資，我相信電盈的價值係大幅高於現價，最少值6元，即前兩年有人想收購的價錢，但我更相信要反映八號仔真實價值的時間可以係--永遠。
當習慣養成，性格有時就難以改變， 買入強勢股必定係賺錢最快方法，但對習慣長期持有的人會有抗拒，有膽接下跌的刀，無膽買上升的股，係一種投資習慣，有時高追唔一定係壞事，但投資方法和習慣就會造成限制，而習慣買入優質股，亦會抗拒買入二三線股票。
我正在長期持有和買入強勢股方面取得平衡，至於瑞房是否一項錯誤的長期投資，暫時係，如果沒有金融海潚的話，結果會係長期的錯誤投資，現在我相信已經改變，未來幾年的業績會證實我的想法。

退市

聯儲局加貼現率令環球股市下跌，市場怕退市措施影響經濟復甦，又一牽強藉口，實際上經濟復甦問題聯儲局比世人更加關心，退市原因只有一個，金融市場重新恢復運作，聯儲局作為醫生，係時候將用藥劑量慢慢減少，病人康復仲要食藥相信無人想食。
金融市場重新恢復運作，而金融海嘯係美國無論係大型或小型銀行都相繼倒閉，係汰弱留強之下，最大受益者將會係留下來的強者，市場定價能力提高，競爭對手減少， 唔怪得投資名宿如巴菲特和索羅斯，都相繼持有大型金融股。
我一向認為滙控結束美國大部份業務，係最差的止蝕方法，東亞賣出手上CDO亦一樣，只為迎合投資者的喜好，管理層係最早公布次按問題，但係處理時未能果斷，結果係市場信心盡失時才決定止蝕，現在事後看來，只差一步就捱過黎明前的黑暗，雖然都係留下來的強者，但就未能完全分享暴風雨過後的成果。
仲有係中信泰富，都係最低位止蝕澳元合約轉讓畀母公司，不過母公司總算好心好報，依家份合約應該仲有錢賺。

不可思議

中銀國際：維持中海油田<02883.hk>「買入」評級
中銀國際表示，由於石油公司今年普遍將增加資本開支，中海油田<02883.hk><601808.sh>經營環境有所改善。雖然只假設其鑽井船隊的日均費率保持平穩，但業務量的增長將推動今年的增長。
該行維持對A股和H股的「買入」評級，將A股目標價由23.15元上調至23.56元人民幣，將H股目標價由12.47元上調至14.96港元。

一向以來，我對大行報告的目標價我都唔會留意，只會注意報告分析的觀點，無論係好與壞，對與錯，不同觀點只係唔同的假設，發生可能性的高與低，有時會對分析有少許幫助，不過大多時會當笑話睇。近來除咗迷幻的士司機，仲有迷幻分析員，A股目標價23.56元人民幣，H股目標14.96港元，一間公司兩個目標價，究竟係如何估值，點去分析得出來的結果，如果23.56人民幣=14.96港元，唯一解釋係人民幣大幅貶值，若然只係單純因為A股價高於H股，所以目標價不同，咁呢份工真係好易做。
我真係想睇下假如一日滙控有係國際板內地上市，會唔會有國際板目標價300人民幣，香港上市的滙控目標價100港元呢啲報告，真係笑話。

回報

大半年來聽得最多的係牛市，財經評論員講得最多的係牛市一期或者係牛市二期。（遲下發展商可以考慮用呢個名）
現在股市開始下跌，開始考驗二百五十日線，恒指現在市盈率大約係17.X倍，息率係三厘幾，大部份公司將公佈全年業績，估計今年的業績大部份會錄得非常理想的增長，恒指市盈率將會大幅下降，估計會下降至13至14倍，而內銀股的市盈率比恒指市盈率還要低，限制新增貸款加上需要增加資本，但唔會影響今年盈利增長，就算減派息比率，股息都會有4至5厘回報。
若然現在處於牛市，11至12倍市盈率加上4至5厘息率的內銀股，低估值水平可以維持幾奈唔知道，但回顧恒指處於3萬點時，內銀股的市盈率係25至40倍，市帳率由4倍至10倍，息率0.5至1.5厘，幾時估值合理相信好清楚。
部分行業盈利係未來幾年將會累創新高，雖然現階段仍處跌浪中，但係現水平買入持有，係今年仍會有不俗回報。
其實如果一年有兩成回報我會好滿意，用投機者角度可以一日做到，從總資產回報方面看，當本金愈大，資產配置愈要從安全角度出發，近日有朋友問關於買樓的問題，其實朋友本身沒有買樓的需要，只想為資金保值，而朋友本身對金錢和投資的概念都很薄弱，實在很難短時間接受股票係低風險，高回報的概念，但我知道朋友會係銀行理想的銷售對象，現在沒有雷曼迷債，但將來必定會出現比迷債更厲害的投資工具，錯誤配置資產同以為係投資的投機行為一樣危險。

盈喜

公佈業績期將近，近月陸續有公司發佈盈喜或者盈警，但今年所發的盈喜著實意義不大，經歷金融海嘯，令盈利基數較低，好多企業今年盈利會錄得倍數的增長。
華能（0902）今年經營環境困難有增無減，盈利難復往年水平，雖然產能大增，但產生唔到盈利，盈喜之後今年或者又到盈警。
工商銀行（1398）盈利雖然唔算高增長，新增貸款應該已經能夠滿足每年15%的增長，以銀行股世界第一的市值每年15%的增長，其實唔簡單。
中國人壽（2628）每次皆以增長50%以上示人，若然還有分析係認為中人壽第四季係蝕錢的話，就真係太傻太天真啦。
平保（2318）增長十五倍，真係冇乜特別，基數太低。
中興通訊（0763）和中國無線（2369）股價其實已經反映咗業績，盈喜已經係過去式，不過中興通訊未來幾年業績都有保證。
中國中鐵（390）和中國鐵建（1186）的增長令估值再度下降，同係招股價，已經比上市時的估值大為下降。
係我心目中，只有盈利創新高的公司才配盈喜。
今年盈利能夠創新高的我認為有七行，（390）（1186）（322）（763）（813）（823）（941）（1088）（2319）（2368）（2888）
中國移動（0941）方面，減價戰始終有極限，因為價格無可能係零，而經濟復甦令中移動係通話量有所增加，維持今年有高單位數字的增長不變。

藉口

睇完《我的2009》，任總對經濟的預測實在值得留意，任總認為歐美經濟的未來幾年的增長會比較緩慢，對經濟真正復甦所帶來的通脹壓力亦表示憂慮，睇法保守完全乎任一貫作風，可惜未有對中國經濟的睇法。
收緊銀根，集資和加息預期，加上內地調控樓市，連伯南克或不能連任聯儲局主席都可以係推倒股市的藉口，相信他日股市上升，理由應該係經濟增長強勁，銀行資產質素改善，淨息差上升，保費收入強勁，售樓收入勝預期，全部都係今年銀行、保險和地產板塊應有的表現。
今次調整的跌幅並沒有想像中大，而發盈喜後的中鐵（390）表現最為理想，基建股的盈利由於有滯後期，未來幾年的盈利應會不錯，加上經濟復甦，之前押後的新訂單亦會增加，近日擬發行的公司債，息率低對財務結構影響正面。
中國銀行（3988）擬發行不逾400億元A股的可轉換公司債券，加上尋求股東同意董事會取得發行不逾已發行A股或H股各自總面值20%的一般性授權，被市場解讀為需要集資二千億，發行新股的一般性授權其實好多上市公司都會有，中國平安（2318）自從千億融資事件之後，每有一般性授權發行H股，都會被解讀為再度集資，今次中行亦如是，可換股債券加上減少派息，有可能已經滿足今年新增貸款的需要，就算真係發行新股，亦未至於要全數發行，現在市場解讀消息已經用放大鏡來看，可以將壞消息無限放大。
近日留意大昌微線（0567），業績對辦的話，相信會係今年的倍升股。

壞消息

加完存款準備金之後又再度傳加息，大市持續下跌，但壞消息對股市的影響並沒想像中大，如果真係加息，可以講壞消息出盡，對股市的影響更加係正面，現在一眾受調控影響而下跌的內地銀行和保險股正係投資的好機會，其實調控措施係一早預期，股市調整只係一個籍口。
航運股因預期經濟復甦關係，今年各大財經評論員都提供買入建議，不過插在航運股的兩把刀只係少咗一把，另一把刀係高油價，油價係現水平對航運股的影響其實係負面，沒有人覺得油價高係因為油價係高峰期係超過百美元之上，習慣了過百美元就唔會覺得七十幾美元油價係高，之不過幾年前的歷史高位係八十美元可能已經無人記得，而當時航運股的業績其實唔算突出。

特性

技術分折從來唔係我強項，可以話比初心者還不如，但股票走勢有部分就有一定特性。
以中海油田（2883）為例，係跌市時往往會跌得比大市要深，恒指若跌百分之二，中海油田可以跌百分之七或或八，但之後幾日就算大市走勢平淡，中海油田亦都會錄得一定升幅，呢一年來都係如此，波幅大係此股的特性。
至於世茂房地產（0813），就好似股市的溫度計，往往比大市先行下跌，不過大市下跌而世茂不跟隨下跌的話，整體大市係之後跌幅都會有限，正正係股市調整完成之時，此股票有跌先升先的特性。
中移動（0941）近來要移動，每每係選擇大市調整之時，已經變咗一個指標。
以上只可以作為一個參考，如果每次都一樣，就無窮人啦

強積金

強積金將會有半自由行，自己供的可以自由選擇強積金公司，睇落好似多個選擇，但原來的基金除非嚴重跑輸大市，否則一筆錢由兩間公司管理，管理費又要畀多一筆，係會蠶食強積金回報， 只要睇下盈富基金的管理費，就知道香港的強積金管理費係非常之不合理，除非有全自由行，否則唔轉其實真係好過轉。
強積金係一筆真正長線投資，但有部份人原來可以當股票咁炒強積金，不過同股票一樣，大多眼高手低，錯多過啱，又係唔搞好過搞，如果真係能夠做到低買高賣，無疑對提早退休係有好大幫助。
自己的強積金組合係全香港股票基金，所以可以睇返恒指。
如以市值計，滙控（0005）已經接近當日150元的市值，大約係萬五萬六億，如果唔係中移動（0941）大落後，股價只係高峰期的一半，恒指現在應該已經係二萬五以上。
再看估值，部份內銀股股價其實同高峰期相差兩成至五成，但市盈率只係當日的一半，當時內銀股大多擁有二十倍以上的估計，今年內銀股未必能有高峰期的五成以上增長，但兩成以上要達標係非常容易。
香港地產股方面，李先生不停增持旗下公司股票，雖然與私有化或許有關係，但與海嘯期間的講話，暫停所有公司旗下的投資項目，與現在真金白銀買入，實在很難看淡香港地產股，正如當時李先生買賣航運股一樣，唔係最高位沽出，但買入價就係當時最低位，和黃擁有世界各地的碼頭，其業務數據正係買航運股的最佳指標。
保險股與當日比較，已經成長不少，股價亦已經反映，今年亦有好多利好因素，煤炭股其實唔平，神華盈利其實唔算高增長，雖然股價唔平不過現在天時配合，應該可以仲貴。
既然覺得現水平合理，現階段實在沒有必要轉換強積金組合，賣出易買入難，廿蚊賣十九個半買返我真係做唔到，賣出後唔跌返三成，賣嚟係無意思。

富士康（2038）近來大幅上升，係行業復甦又好，有新訂單都好，值博率都低咗，不過另一隻和富士康相關度極高的股票大昌微線（0567）卻未有跟隨大幅上升，大昌微線大部份收入都來自富士康，和未轉營之前的申洲國際一樣依賴uniqlo，而大昌微線中期盈利開始復甦，但現在股價只係高峰期的四分一。

常理

內地銀行今年頭兩星期新增貸款大增，就算真係過萬億都無問題，錢遲早都要借出去，早於借可以收多啲息，如果以內地加存款準備金和預期加息作為跌市理由，真係唔足夠，市場一早已預期加存款準備金和加息，只係沒有預計會咁早就加，若然換個角度，今年一月新增貸款只有幾千億或更少，係真正的收緊銀根的話，咪要恐慌性拋售，今年內地銀行生意咁好，都要係沽貨理由的話，咁惟有恐慌性買入。
內銀集資，生意愈做愈大，增資係無可避免，何況現在內銀的市帳率冠絕全球，高市帳率和市盈率無論係配股或供股，對每股盈利攤薄其實很少。
至於加息，對招行來講真係百利而少害，當然，若果利率真係太高的話，對各行各業都唔係一件好事，保險股或者會係例外，但暫時睇唔到有大幅加息的可能性。

一萬億

一萬億，以香港上市公司能夠超逾的市值計算，只有滙控（0005）、中石油（0857）、建行（0939）、中移動（0941）、工行（1398）、中人壽（2628）六間。
但我相信最快十年至十五年，一億萬市值的上市公司數目至少會超過二十間以上，其中大部分都應該係內地企業，主要由銀行、保險、石油、煤、鋼、科技、電訊、零售、飲品、新能源和房地產企業所組成。
好多投資者都在尋找第二隻騰訊（0700），但找到又如何，如果唔係用買入持有的方法，加上對股票深刻的認識，根本就享受唔到幾年內五十倍以上的升幅，不要忘記，持有騰訊到現在的係經歷金融海嘯呢個巨浪，呢類高人大有人在，但為數極少。
與其眾裏尋它，不如選擇能見度較高的方法，係未來，內地銀行（中行、交行、招行、民行、農行）、保險（平保、太保）、石油（中海油）和煤（神華、中煤）等係最有機會能輕易超逾一萬億市值的企業，投資呢類股票雖然無騰訊幾十倍的升幅，但由於行業前景穩定，大環境亦有利企業發展，預視度高，可以話係睇得到的未來。
到時建行和工行的市值可能去到十萬億，睇落好似好誇張，但以工行為例，其實股價只係去到30元，只係現時的5倍，如果加上人民幣升值因素，絕對係有可能發生。

挑戰自我的投資組合

之前一次更新已經係十月，不過組合悶咗咁奈終於都發力。
當時現金結餘只餘$460
12月17日收取鷹美國際（2368）10,000股13仙股息　$1,300。
現金結餘增至$1,760

一年之始，組合即有變動，會沽出中海石油化學（3983）6000股，沽出價為5.15元，扣除手續費後收取$30,700元，半年回報二成半左右。
現金結餘增至$32,460
組合將會買入中國中鐵（0390）以收市價最高價6.38元買入5,000股，連手續費後需要資金32,100元。
現金結餘減至$360
組合總值：120,435

挑戰自我的投資組合

中國中鐵（0390）　　5,000股
買入價6.38元 　現價6.32元

瑞安房地產（0272）　7,500股
買入價5.15 　現價4.53

鷹美國際（2368）　　10,000股
買入價2.00 　現價3.37

中海油田服務（2883）2,000股
買入價8.65 　現價10.4


沽出
中海石油化學（3983）6000股
買入價　4.3 　現價5.21

註：投資組合由2009年6月29日成立。
　　初始金額為100,000元。
　　除股息外，不再有資金投入。
　　恒指當日收市價為18,600點，投資組合以當日最高價位買入目標股票。
　　所有股票以當日最高價確認買入，沽出以最低價確認沽出。
　　每次買賣手續費為200元。
　　持有挑戰自我的投資模擬組合部分股票

信心

恒生指數於2009年末的市盈率係19.57倍，隨着今年企業盈利上升，係之後幾個月公佈業務之後，恒指市盈率應該會大幅下降，財經評論員大多會預期今年恒指走勢或者合理值，今年左右恒指走勢的會有企業盈利增長、退市政策、加息、通脹、新型流感、貿易保護主義，還有係信心。
信心呢樣嘢就好似興奮劑，令人會有幻覺（我都要扮下美麗高解像呢套教育電視），覺得幾十倍、或者幾百倍PE的股票係平，但幾倍PE的股票係貴，又或者三萬點係平，一萬點係貴，有部份投資者買的股票其實係唔認識，完全因為其他人看好而買，呢啲係興奮劑的副作用。
我相信少部分人有預知能力，但我沒有，我沒能力估計恒指今年的合理值，只要企業盈利未來大向方係向上就可以，要注意的只是係信心過度澎脹，係高位時將不合理合理化，其他退市政策、加息、通脹、新型流感、貿易保護主義其實我都改變不了。

今時今日的財經節目已經變咗娛樂節目，嘉賓能夠非常認為的答觀眾的問題，實在非常專業。
呢隻股份能夠係農曆新年後升上邊個價位，我心想，我連明年升定跌都唔知，佢竟然能夠知個幾月之後的事，利害，呢份工其實都唔易做。
另外好奈之前有觀眾打上去問我三個幾買咗騰訊三千股，依家點做好，我又係度諗，嘉賓都應該未買過一隻賺到五十倍的股票，應該無資格答呢個問題。

變

思捷（0330）收購華潤合營係業務專注歐洲業務轉變為中國與歐洲雙頭車馬的發展，雖然中國業務規模尚小，但業務前景大有可為。
日前華能（0902）斥巨資收購山東電力集團和魯能發展的九項資產，本次收購完成后，華能國際可獲得已投產可控裝機容量3330兆瓦（火電3330兆瓦），權益裝機容量3330兆瓦，在建及核準容量716兆瓦（火電600兆瓦、水電16兆瓦、生物質發電100兆瓦），前期及規劃項目容量12930兆瓦，上大壓小已關停容量270 兆瓦；煤炭項目地質儲量合計27.77 億噸，可采儲量合計18.04億噸，規劃產能合計800萬噸/年；港口兩個，擁有碼頭10座，其中已運營碼頭6座，年吞吐能力合計669萬噸，在建碼頭3座，年設計吞吐能力合計1295萬噸，前期碼頭1座；以及2萬噸級運能的船舶5艘。
係十年前，華能係一隻高增長股，但近年由於煤價上升，售電單位燃料成本由2001年每兆瓦時95.1元人民幣，上升至2009年第三季單位燃料成本約為每兆瓦時212元，令業績停滯不前，股價每況愈下，係時候需要轉變。
華能由以往專注發電業務，收購電廠，轉為煤電一體化相信係未來發展策略，與其等待煤電聯動，不如主動出擊收購煤炭控制成本實際得多。
收購後煤炭規模比重尚小，電廠規模極大，可以說是與中國神華（1088）業務完全相反的格局，電力板塊近年處於捱打的局面，短時間政策難以改變，華能亦完全明白這道理，收購煤炭和海外電廠，發展可再生能源係大方向。
全國性電廠比香港兩間獨市生意賺錢能力還要差實在可悲，短期值博率當然以中國神華與中煤能源（1098）這類能自由定價的煤炭商為佳，長期看，電力改革完成係遲早問題，加電費亦有節約用電的作用，投資華能相信與投資瑞房（0272）一樣，會係超長線投資，但需要一般散戶所沒有的耐性。
另外，俄鋁上市，每手金額亦創紀錄，散戶IPO要做心理測驗，奇就奇在上市後在自由市場買賣的散戶，應該係唔使做心理測驗的，如果真係咁高風險，點解仲要畀俄鋁上市，仲要咁多機構投資者參與，近幾個月中國鋁業（2600）多次上調氧化鋁價格，或會帶來啟示。
百營（761）可能係少數轉營股之中，真正有煤炭開綵的公司，能與華能及其他電企簽定長期合同，可惜投資呢類股票不符我投資取向。

催化劑

幸運地勝出了看誰跑得快第一集，之所以說幸運，是遊戲中並沒有出現創維數碼（0751）與海爾電器（1169）這兩隻主題股，否則一早已經可以分勝負。
沒有出現呢類對手，原因可能係心理上的一個盲點，每個人係選股方面要選最好的，所以會不自覺選了千里馬或馬拉松選手，不過由於係鬥跑得快，千里馬呢類能夠跑十年的股票，會未夠時間發力，但對手已經過咗終點。創維與海爾係我心目中可以話完全唔入流，至少啲產品我係唔會買，買過美的吸塵機，用來粗用吸裝修的沙石，一開嘈過飛機起飛，要戴耳塞，兩分鐘之後我已經擔心過熱，國貨真係完全畀唔到我信心，但兩股今年食正過策飛昇，明年會否繼續真係唔知道，因為一向無留意兩股。
另一係遊戲重點，係時間限制，透明度愈高的股票，係時間內最多正面新聞資訊、良好業績公佈，對股價係最有利的催化劑。鷹美就係喺時間內公佈了兩次優秀業績，但來到跑得快第二集，雖然鷹美估值都仲係便宜，但未來半年缺乏業績公佈，對股價刺激有限，而且再選鷹美，考驗唔到自己選股能力。
今次心目中有三隻股票選擇供選擇，一係中海油田服務（2883）、二係李寧（2331）、至於三係比亞迪（1211）。
比亞迪公佈完第三季業績之後，已經脫離泡沬價，預期38倍PE都仲係好貴，不過管理層有信心明年新車銷售再增一倍，達80萬輛，由於比亞迪透明度高，每月公佈銷售數字，如果首五個月已經能夠接近去年四十萬輛，股價再度上升空間極大。
李寧（2331）係眾多內需股之中估值較便宜，不過這兩日暴升接近兩成，令我失去選擇的動力。

跑得快II今次選擇中海油田服務（2883），預期明年首季業績有盈喜機會極大，估值亦合理。唔預期會憑此股勝出，再勝出機會係千二份之一，今次目標前五名。