港交所（0388）
港交所股價隨成交突破升億股價不斷向上，同公布中期業績時走勢淡靜不可同日而逾，由於股價上升，現價安全值相對下降，股價波幅與股市波幅關連極大，由於不斷有新公司來港集資，相信就算再來一次熊市，未來成交額維持係六至七百億會相對容易，對港交所盈利有穩定作用。
比亞迪（1211）
股神訪華令比亞迪股價持續走高，若然股神續持相信會更加不得了，不過第三季業績應該唔會好得去邊，未來前景，係電池業務的產業鏈應該會愈來愈多，王傳福講過當有盈利就會分拆上市，汽車業務離上市之期應該不遠了。
中銀香港（2388）
香港和內地估值最貴的銀行股，貴得有道理，今年盈利增長其實有數得計，貴在人民幣業務究竟能產生多少盈利，唔知道先有得炒，不過應該唔會太多，循序漸進未來收益應該會不斷增加，但預期市盈率已接近廿倍，同被受冷落的內銀股便宜估值，係慨念有得炒同無得炒的分別。
內房股
內房股持續受政策打壓，一次力度比一次大，但下跌幅度一次比一次少，今次的調控可能會有利內房發展，樓價平穩不大幅上升的話，對有大量土地儲備和待售物業的內房股最有利，以量取勝。
利和經銷（2387）
私有化成功，但由於可以換股唔收現金，相信都唔會有人收現金21元，現價23.95元，利豐股價升跌係未來一段時間對利和影響會好大。
中移動（0941）
繼續維持全年業務增長一成，每戶收入下跌空間愈來愈少，經濟好轉因素對中移動亦有利。
領匯（0823）
一間持有得愈奈風險愈低的股票，股息收入四厘唔算高，但股息能維持每年15%增長，應該有好一段時間，總好過買銀行的新類型產品或者人債。
內需股
估值愈來愈貴，增長愈來愈少，康師傅（0322）和恒安國際（1044）的PEG都高於1以上，真係買唔落手，李寧（2331）估值反而唔算太高，但李生近日的財技反而幾高。
大家樂（0341）大快活（0052）
大家樂好似創咗歷史新高，估值係大快活一倍，安全性方面反而大快活高一點，當然經營效益方面係大家樂勝一籌先可以享高估值，但係食物味道方面兩間其實已經無乜分別。
招商銀行（3968）
招行發盈喜，其實盈利好係正常，就算之前對銀行業所有不利消息，其實都唔係新鮮事，對撥備、資本、地市政府融資、利率市場化、而樓價下跌又或者經濟下滑做成的壞帳，以上所有都係銀行永遠面對的問題，要驚恐怕所有行業都會有一定風險，事實上，未來幾年銀行的盈利只會有增無減，監管只會對銀行未來發展更為有利。
碧桂園（2007）
下半年盈利應會更佳，回購可換股債有助盈利，股價回升令對賭協議對盈利做成的虧損減少，甚至會有盈利，售樓收益有增無減，打擊樓市對碧桂園影響輕微，平均售價以呎計，係幾百元一呎，以內地來講絕對係上車盤。
MAX兄,提起內需,我想問一下如果 PEG <1 係咪一定代表抵買?我想來想去也不明白為何以1為分界(也不明白有什麼意義)。內需有無留意瑞年(2010),PEG 細過1。
回覆刪除低於1唔一定係低買，估值要睇多方面因素，但高於1的話，估值就多數屬於偏貴，以康師傅和恒安為例，由於盈利基礎開始較大，恒安增長雖然理想，康師傅就受原材料上漲而減慢，但兩股的股價卻不斷創出新高，絕對係唔平。
回覆刪除瑞年以保健品，涼茶飲料和醫藥主打，但盈利基礎極唔平均，新上市公司首年盈利通常都會異常突出，用PEG估值的話，應要睇有幾年往績盈利的公司才有比較，最後係要選擇負債水平健康和現金流強勁的公司，盈利有時係可以不斷靠借錢投資而谷出嚟，福記食品就係咁出事架啦。
請教一下，中國平安的金融一體化模式，會否有什麼問題？例如管理問題，風險問題等。最近看秦曉的新書，原來當年招商上市時，也有人很想走金融控股模式，結果秦曉反對而作罷。
回覆刪除另一個問題，是：從保險到銀行，和從銀行到保險，是否有質的分別。香港的例子，是從銀行到保險（例如HSBC和恆生）取得很大的成功。但似乎沒有從保險到銀行的。
平保管理問題應該唔使擔心，滙控作為股東都會提供意見，至於風險問題，係投資富通一役暴露了管理層危機意識不足，現在專注國內市場反而更好。
回覆刪除秦曉反對招行走金融控股模式，其實唔係完全反對，秦曉當時係贊同馬明哲走金融控股模式，反對招行係因為作為招商局控制的企業，首要目標要主業做強，金融控股係之後的事，呢點係秦曉對馬蔚華所講的。現在招行正申請合資保險--招商信諾，亦有入股基金股權。
香港的例子對內地係不適用，首先香港係成熟市場，保險攪銀行，想爭樓按--難，網點投入成本高--租金貴，而且最根本原因，係唔需要，以強積金為例，只係管理費都有1至2%收入，係無風險高利潤生意，香港銀行息差得1厘幾，保險公司要係成熟市場搶銀行市場份額，係吃力不討好的事。
最重要一點，係習慣，有幾個人會轉用開的銀行，而企業往來銀行更加唔會轉換。
其實保險公司都會有借貸，不過係比銀行更低風險，保單係可以借錢的，利率亦比銀行平，更加唔會有壞帳。
香港的銀行之所以經營保險，係因為利率市場化，息差不斷收窄之下的出路、賣基金、迷債和保險都係拓展非利息收入的途徑。
謝謝回覆。我感覺和交銀不同，匯控應該對平安的發展，應該有太多的介入。平安的野心很大，擴展得很快，業務範圍愈來愈大，不太知管理上是否跟得上。反而招商和民生，走的方向更讓我安心一點。
回覆刪除打錯了：沒有太多的介入。
回覆刪除匯控對平安其實可以咁講，係唔需要太多的介入，交行一直以來的發展歷史，從未有過國際化的管理經驗，而平安的發展歷史，係未上市時，已經有好多外資介入，自身亦有尋求麥肯鍚的協助，到匯控入股，亦有提供意見，平安有任何問題，都能夠致電係世界各地的匯控尋求協助，平安本身係管理上已經屬於國內最前列位置。
回覆刪除平安的野心很大，若然無野心，你唔會見到今日的平安、民行和招行，以上每一間的歷史其實只係短短二十年，從無到有。
至於擴展，反而富通一役走回頭路，專注國內，係發現自身問題所在。業務範圍愈來愈大，能否平衡發展係另一問題，銀行業務需要的資本金要求，會令平安的資金需求愈來愈大，會唔會令其他業務發展唔平衡係之後要面對的事。
招行和民行會令人安心，只因為注專主業，不過民行的商貸通貸款，能否將小微企業養活成小企業，係將來民行經營的考驗。