地王

有人係一個圖表派，精通電腦程式的人，所選擇的股票全部都係由電腦計算出來。

有人問我一條問題：「畀隻股票你買一日肯定賺一成有冇興趣？」
我答：「無興趣，一日賺一成太快啦，我想一年賺一成。」
有人：「一年，有冇慢啲呀，我一日就搞掂啦。」
我沒有回應有人，因為答案就好似IQ題，明白就自然會明白，唔明就點解都唔會明。

係漫畫《少林寺第八銅人》裏面，張君寶練拳時話「慢慢來，比較快」，呢句話基本上係完全唔合邏輯，但有時投資慢慢來，係比較快的，以二十年的投資期，每年平均增長一成的話，加上股息再投資，係投資期最後用的五年時間，就可以做到開始十年的總回報，複式回報係愈慢愈快。
投機的話，就算本金不斷增加，有沒有人會用全部的錢去投機（我相信會有，但好少），我唔相信會有肯定賺的股票，而肯定贏的馬，通常都跑到影都無，體育版不勝無歸的標題，亦都九成贏唔到，去賭場亦只有第一舖係有五成贏面，有興趣可以睇下博彩股的年報，就知開賭有幾好賺。

投資與投機的分別係注碼，兩者都係賺一成，但回報會相差好遠。

恒隆地產（0101）公布業績，一間對股東非常負責任的公司，而係業績發佈會裏面，主席陳啟宗對提問，答得非常精采。
對內地地王看法，「地王，唔好預我，投咗通常都會後悔。」
高位買咗股票的人會後悔。
對地王看法，「最好的地段，最平的價錢，就係地王啦。」
最好的公司，最平的價錢，就係股王。
對未來樓市看法，「唔知道，懂得答呢條問題的人，係六個月前估唔估得到個樓市會好咁奈，個人唔想預測，答得出都係呃你。」
即係話答得出股市走勢的人都係呃你。