業績

業績期開始，基本上可以話無驚喜，滙豐（0005）微增派息係意料中事，為應付資本要求，係唔會一次過大幅增加派息，渣打（2888）頭九個月都好，全年有理想增長係預期之內，至於中交建（1800）增長兩成，市場話有驚喜，之不過係之前太悲觀，基建股除中鐵建（1186）之外，中鐵（0390）業績都係好的，國泰（0293）今年業績好，但高油價隱憂始終係一大患，保誠（2378）業績好派息增爆升，但被日本震一震大跌，宏利（0945）同友邦（1299）都唔係大跌，而且友邦同宏利係日本業務應唔會比保誠小，保誠又好似跌得唔係好合理。
內銀股方面，業績未出，都唔應該有一隻會係低雙位數字增長，市場怕集資，但以今年內銀貸款增長目標係一成半，盈利增長兩成係無問題的，市場調低估值，但盈利仍會持續上升。
保險股方面，無疑係受惠加息周期，A股雖然低迷，但個人覺得係易升難跌，A股權重股方面業績係理想，銀保方面受限制對依賴銀保的保險公司保費增長不利，而且由於增長基數不斷加大，中人壽（2628）係保費增長能有一成而係難能可貴，而平保（2318）今年有兩成增長的話會好理想，至於明年同樣有兩成增長，我會有所保留，而以內涵價三倍作為中人壽參考估值，首要條件係A股4千點。
香港地產股，係預算案後開始推盤，今年業績如何，相信都唔難估，一手係貴，但二手叫價瘋狂，令一手樓溢價收窄，反而對銷情有幫助。
內地地產股，究竟限購令影響如何，三月銷售數字會見真章，不斷受政策打壓令估值處低位，若然銷售數字理想，今年盈利又會創新高，不過股價可能會先創新低，內房股真係無得估。而內地樓市，政府大量起保障房，我認為係有點似新加坡的做法，保障房會否影響內房銷售，係絕對唔會，住得保障房都唔會有能力買樓，對內房銷售何來影響。
至於比亞迪（1211），2月銷售唔理想以農曆新年為解釋，那為何吉利（0175）按年有增長，相信農歷年新唔能夠作為藉口，現在對比亞迪有利的，只有政府對新能源汽車的政策出台，其次就係高油價，其他真係睇唔到。

觀察名單

比亞迪（1211）
汽車銷量比上年同期下降一成五，但若以按月比較，係汽車購置優惠政策取消之後，比之前幾個月的確係回升不少，股價大幅回調係因為高增長概念不再，若然銷量能夠持續，今年汽車銷量應會有一成以上增長，會係行業前列分子。

領匯（0823）
穩定增長，加上派息不斷增加，不過由於現在利率低企，領匯息率比兩電還要低，現在買領匯比買樓好係唔使受政府額外印花稅所影響，而且風險亦較低，但就少了扛捍效應。

阿里巴巴（1688）
若然用圖表比較，近年阿里巴巴和騰訊的走勢係各走各路，但阿里巴巴近期的強勢，基本上與騰訊係無關係，主要原因係加價，聽內地朋友講，加幅係五成，不過舊會員好似仲係可以用返舊價，今年能夠有加價能力的企業，股價應會比受政策影響不能加價的企業更勝一籌。

內房股
係一招辣過一招之後，股價可以用兵敗如山倒來形容，撈底絕對係會底完再底，除非有無限子彈，否則真係捱完一年又一年，信心係有，但係輸緊錢流緊血，若然好似碧桂園（2007）有好業績，加上增派息，還可以一守，缺錢房企，係今次加息潮，可能真係會玩完。

內銀股
雖然存款準備金率已到歷史新高，但放係央行的準備金都會有利息收入，只會令內銀今年盈利輕微減少3至4%，不對等加息亦會令息差擴闊減少，但對活期存款較高的內銀影響輕微，總括來講，內銀今年盈利維持2成以上增長係無問題的。至於集資問題，反而係取決於管理層對貸款和資本係未來兩至三年如何運用來決定，集資途徑亦有很多，唔一定要好似民生咁定向增發。

觀察名單

建滔化工（0148）
銅價上升對建滔係有影響，但化工和地產業務能充份分散建滔業務風險，股價比納入觀察名單時升了一成半，現價尚算合理。

ASM太平洋（0522）
比最初納入觀察名單時升了四成，之前對西門子旗下的收購已經轉虧為盈，若然收購效益與管理層預期一樣，未來幾年股價有望翻一翻。

美聯物業（1200）
樓市基本因素未變，雖然政府政策令樓市降溫，但可能令二手供應會更加短缺，今年樓市成交宗數可能會減少，但成交價上升之下，美聯的盈利應會維持，但高增長難預期，優點係息率高，而且與港交所對成交量非常敏感，樓市成交量上升時爆發力十足。

民生銀行（1988）
為應付監管機構對資本要求，上市未到兩年再度集資，真係令人失望，係有需要，但時機其實可以再等下，A股低沉下集資足成攤薄，而且為何當日H股首次上市時，因為股價低問題而唔上，現時要低價發行A股。

中國平安（2318）
開始好多不利傳聞係平保身上出現，監管機構否決收購深發展和巨額集資的傳聞，但利好因素其實比較正面，發展方向正確加上利率不斷上調，股價下跌反而提供買入機會，集資唔一定係壞事，高位配股比低價賤賣好得多。