深不見底

究竟今次跌浪的底部會係邊呢，相信無人會知，過後就有人話你知。
財經演員的所謂確認見底，通常係反彈咗幾千點之後，就會話畀您聽確認見底，可以入市撈底。
恒指無疑係超賣，長遠來講恒指係唔會長期係8倍市盈率的底部，雖然過去股災曾經跌落去5倍，但係8倍底位同20倍高位之間，以中位數14倍計23,000係正常。
而依家問題係講到經濟衰退，失業率上升加企業盈利倒退，確係會發生，汰弱留強係無可避免。
但向好的一邊只係無人睇到，油價由高位回落，經營成本同通帳都會下降，而失業率上升亦會令到員工成本下降（對中國係有利有弊）。
今次跌浪亦到睇到一啲不務正業的公司，炒賣衍生工具。雖然中信泰富斬件黎賣都值8蚊，但失去誠信的公司，基本上可以從投資名單上永久除名。
先見之明
阿里巴巴主席馬雲同思捷主席高漢思早前看淡經濟前景，其實已經做好準備過冬，兩間公司的淨現金同經營現金流係比好多過度投資的公司好（玖龍紙業同理文造紙甚至內房股），係今次經濟衰退的基本生存條件，汰弱留強，經濟好轉時，市場佔有率就會上升，就會繼續增長。

倒錢落海

恒指再次下試年內低位，距離合理價值愈來愈遠，係呢個人心虚怯的時候，基本因素基本上已經係可有可無。
恒指市盈率係十倍樓下，工業股更跌至五倍以下，記憶中無乜點跌過的股票只有康師傅同維他奶，以恒指息率來計算，現在買入係比買迷你債券的息率還要高。
風險當然係下跌空間深不見底，現時買入同倒錢落海好似無咩分別，但股價下跌對我又不會做成虧損，買入又會增加未來現金流。幾年後就會知道今日所做的決定係啱定錯啦。
現在不宜買入的股票有資源股同基建股，雖然便宜，但息率太少啦，原材料下降對基建股係有利，但毛利真係太底啦，未有好好咁去控制成本，要買的話只會選龍工，財政穩健，出口量上升。內房股開始到收集期，瑞房會係首選，世茂雖然評級下降，但公司財政應該未有問題，仲有能力回購，soho雖然真係超值，但集資回來的資金用作回購而唔係全力收購土地，印象分下降。兩隻廢紙若果係下次業績後負債下降，會係幾吸引的投資選擇，銀行股雖然面對壞帳風險上升，息差收窄，但呢兩年的撥備幅度大增，應該無問題，反而擔心會唔會有投資美國其他銀行債券仲好。保險股來年盈利應該會唔錯，係最值得投資股票。滙控係萬四點仲未見到104最低位，只係跌咗三分一，唔使講都知危機過後股價會係點啦，真係愈危愈有機。