二萬八

投資大師John Templeton係1999年時曾經預測道瓊斯工業指數會在21世紀結束前到達一百萬點。聽落好似冇可能，但計落又好似有機會。
正如我覺得恒指會見到十萬點一樣，須時幾奈呢，我估計二十五年內應該有機會見到，十萬點只係升四倍，恒指由一百點開始到依家二萬二千幾，都升咗二百幾倍啦。
但預測從來都不是我的強項，都係計數實際啲，滙控係星期一將會公布中期業績，間間大行都話倒退一成至三成，但如果唔係倒退呢，滙控係其他國家的業績公布出黎都幾好，墨西哥、加拿大，中國雖然無公布，但睇下國內銀行的盈喜，都估到應該係增長啦，如果美國滙融的撥備無預測的大幅上升，咁滙豐的盈利都不至於倒退三成咁多掛。如果反過來有增長，咁所有大行的恒指目標價又要再計過啦。
至於內地保險股方面，啲大行垃圾分析員預測又係嚴重倒退，又係A股作怪，一個好奇怪的問題，國壽無出國際會計準則季報，平安有，平安首季有增長，國壽保費又比平保增長快，雖然大部分係銀保，問題黎啦，平保首季增長理由係業務分散，銀行業務增長強勁，有冇人知銀行業務佔平安業務係幾多成呢?
咁究竟兩大保險股係中期業務係增長定係倒退呢，假如又係增長又會點呢。
內地銀行的盈喜不比上年少。
肯定盈利倒退的只有國泰同中鋁，而中移的增長我估係歷年最佳。
假設滙控同兩保中期業務係有增長的話，恒指二萬八都好正常0既事。
當然，個人黎講，最好就係業績派息有增長，股價不停跌啦。
二萬八、萬八對我都無乜關係。

後記
滙豐公布咗中期業績倒退兩成九，如不計算上年度中期的特殊盈利，交行、平保、興業係A股上市，實質倒退兩成，係撥備大幅上升之餘只係倒退兩成，算唔錯。撥備基本上仲多個盈利，幸好股息繼續增加。看來要等下一次的恐慌性拋售先可以見到104啦。
平保亦公布咗中期業績，盈利輕微倒退，係雪災、地震、A股腰斬之餘，只係輕微倒退，比起上年所謂炒股炒返來的業績，今次係真材實料啦，如果唔用上年比，用前年比較，複合增長程度係好驚人喎。唯一比較令人擔憂的是，付償能力大降，只係比規定高少許，產險綜合成本率係106，多做多錯，還有漏稅的傳聞係真的。